Hlutafé Arion banka var 1.660 milljónir króna að nafnvirði í árslok. Hlutafé félagsins tilheyrir allt einum flokki hlutafjár og er hver hlutur ein króna að nafnverði og eitt atkvæði. Viðskipti með hlutabréf bankans fara fram hjá Nasdaq Iceland en einnig hjá Nasdaq Stockholm í formi sænskra heimildaskírteina (SDR) þar sem eitt SDR jafngildir einum hlut. Aðalfundur Arion Banka samþykkti þann 16. mars 2021 að lækka hlutafé bankans um 70 milljónir til jöfnunar eigin hluta, úr 1.730 milljónum króna í 1.660 milljónir króna að nafnvirði. Var lækkun á eigin hlutum tilkynnt þann 19. apríl 2021. Í árslok átti Arion Banki 140.623.501 eigin bréf sem jafngildir 8,54% af útgefnum hlutabréfum í bankanum. Enginn atkvæðisréttur fylgir hlutum sem eru í eigu bankans.

Stærstu hluthafar og hreyfingar

Umtalsverðar breytingar urðu á eignarhaldi bankans árið 2021. Eignarhlutur Arion banka í eigin bréfum jókst á árinu aðallega í tengslum við endurkaupaáætlun en hækkunin nam 7,85 prósentustigum. Hluthafar sem mest juku eignarhlut sinn í bankanum á árinu 2021 voru Lífeyrissjóður starfsmanna ríkisins um 3,06 prósentustig, Íslandsbanki um 1,84 prósentustig og Brú lífeyrissjóður um 1,72 prósentustig. Þeir hluthafar sem minnkuðu hlut sinn mest á árinu voru Taconic Capital Advisors um 23,22 prósentustig, Sculptor Capital management um 6,12 prósentustig og Eaton Vance um 1,50 prósentustig.

Í árslok 2021 var Lífeyrissjóður starfsmanna ríkisins stærsti hluthafinn í Arion banka með 9,10% eignarhlut. Gildi lífeyrissjóður var annar stærsti hluthafi bankans með 8,83% eignarhlut.

Heimild: Nasdaq Iceland, Euroclear Sweden og Modular finance

Í lok árs 2021 voru rúmlega 91% hluthafa íslensk. Aðrir hluthafar voru fyrst og fremst frá Þýskalandi, Bandaríkjunum, Svíþjóð, Kúveit og Bretlandi. Heildarfjöldi hluthafa bankans var um 11.300 í lok árs 2021 og fjölgaði um 3.900 á árinu eða um 53%.

Eignarhald - landaskipting

Heimild: Nasdaq Iceland, Euroclear Sweden og Modular finance

Hlutabréfaviðskipti og árangur

Verðþróun hlutabréfa bankans var jákvæð á árinu samhliða styrkari afkomu og minnkandi óvissu varðandi áhrif COVID-19 faraldursins. Hlutabréf bankans á aðalmarkaði Nasdaq Iceland hækkuðu um tæplega 101% á árinu og SDR á Nasdaq í Stokkhólmi hækkuðu um tæplega 119%. Mismuninn má fyrst og fremst rekja til styrkingar íslensku krónunnar gagnvart þeirri sænsku á árinu. Innlend hlutabréf Arion banka hækkuðu mest allra á aðallista íslensku kauphallarinnar á árinu 2021.

Meðalvelta á árinu 2021 með hlutabréf bankans og SDR hækkaði frá fyrra ári. Dagleg meðalvelta var um 7,6 milljónir hlutabréfa og um 331 þúsund SDR eða um 8 milljónir bréfa samtals samanborið við um 4,9 milljónir bréfa árið 2020.

Þróun hlutabréfaverðs Arion banka og banka á Norðurlöndunum

Ef verðþróun hlutabréfa og SDR á árinu er borin saman við valda skráða banka af svipaðri stærðargráðu (mid cap) sem og stærri (large cap) má sjá að þróun hlutabréfaverðs Arion banka kemur best út á árinu 2021.